ஆடாய் கனைக்கும் சிங்கம்

 பல் இல்லா கிழவன் கையில்

பல்ப மிட்டாய் கிடைத்து விட்டால்   

பல் முளைத்து விடுமாஇல்லை 

பல்ப மிட்டாய் கசந்திடுமா   

மாடு கட்டா ஏறு கொண்டு

மண்ணை உழுத மடயனுக்கு   

மண்ணும் மனம் கனிந்திடுமா

இல்லை மாடு ஓடி வந்திடுமா   

போகும் வழியில் சில நேரம்

பொறுமை நம்மை நீங்கிப் போகும்   

அந்த பொறுமை சற்று குறைந்து விடின்

நம் பெருமையது குறைந்திடுமா   

போகட்டும் விட்டு விடு

வெறும் புகழ் தேடும் கூட்டம் அது   

சிங்கமாய் தன்னை நினைத்து

சினம் காட்டும் ஆடாய் கனைத்து

தனிமை

 தானாய் விரும்பினால் வரம்

தன்மீது திணிக்கப்படுகையில் ரணம்

கவிஞனுக்கு காதல்

காதலுக்கு வேதனை

இளையோருக்கு கனவு

முதியோருக்கு வலி

குழந்தைக்கு எதிர்பார்ப்பு

அது சுகம் என்று

எண்ணத்துணியும் சோகம்

பேருந்து பயணம்

சாலையோரம்
சகதி ஊடே
சற்றே சங்கடத்தோடு நின்றிருந்தேன்
தூரத்தில் வந்தது என் பேருந்து
ஏறும் வரை இருந்த சலிப்பு
கண்டதும் வந்தது ஓர் நகைப்பு
என்ன ஒரு அமைப்பு
ஏறினேன் உள்ளே
சொர்க்கமோயோசித்தேன்
இருபுறமும் தேவதைகள்
போதவில்லை என் இரு விழிகள்
கிட்டியது ஒரு இடம்
ஒரு தேவதையின் வலப்புறம்
இடிக்காமல் உள் நுழைந்தேன்
ஓடியது என் வாட்டம்
இனி போகும் வழி கொண்டாட்டம்

தலைவன்

தமிழ் எந்தன்
பேச்சு
தமிழே என் மூச்சு
என்று
வெறும் வார்த்தை பேசி
வியாபாரம் செய்யும்
விபச்சார தலைவர் பலர் உண்டு இங்கு
நம்மை  ஆள தேவை
ஒரு நிஜமான நேர்மை
அதில்  இன்னும் வேண்டும்
மிக நீண்ட பொறுமை

வரும் பலரும் இன்று
கை வரும் பலனைக் கண்டு
பாதைகள் மாற்றி தம்
பார்வையும் மாற்றினர்

வருவாரோ ஒருவர்
என்று எதிர்பார்க்கும் நேரம்
வந்திறங்கி பார்ப்போம்
தலைவன் அற்ற குறை தீர்ப்போம்

மக்கள்

ஈரமில்லா சட்டை
சோர்வு இல்லா முகம்
வியர்வை ஆகா விரல்கள் 
நிற்க நினைக்கா கால்கள்
பறக்க துடிக்கும் கைகள்
பக்கத்தில் பார்க்க கூட
முயலாத கண்கள்
காதணியாய் காதொலிகள்
கால்களை கவனிக்க
வெளிநாட்டு காலணிகள்
பேச்சு இல்லை
சிரிப்பு இல்லை
தூக்கம் இல்லை
பார்ப்பவர்கள் எல்லோரும்
உயிரோட்டம் உள்ள இயந்திரமாய்

----------------------------

முட்டாள்கள் தினம்

வருடத்தில் ஒரு நாள் மட்டும்
அனைவரும் அறியும் படி
மற்ற நாட்கள் நமக்குள் 
மட்டுமே பெரும்பாலும்

சிலருக்கு.......

முழு நிலவில் காதல் சொன்ன அன்று
மூன்று முடிச்சு போட்ட அன்று
முகம் முழுதும் ஆர்வத்தோடு
முதல் நாள் கல்லூரி போன அன்று
படிப்பின் இறுதி நாள்
கிடைக்கும் வேலை பற்றி எண்ணும் அன்று
வேலையில் சேர்ந்த பின்னே
சொத்து சேர்க்க தோன்றும் அன்று
பிள்ளை பிறந்தால் சிரிக்கும் அன்று
பெண் பிள்ளை பிறந்தால் முகம் சிறுக்கும் அன்று

இது போல
நாம் மாறும் நாட்கள் சில
(ஏ)மாறும் நாட்கள் பல
ஒரு நாளோடு முடியவில்லை

----------------------

கண்ணுறங்கும் கண்மணியை 

கண்டிருந்தேன் காலையிலே 
அவள் கொண்டுறங்கும் அமைதியினை 
என்றும் கொடுக்க மனம் உறுதி கொண்டேன் 
கோவிலிலே கண்டுணரா இறையினை 
இன்றுணர்ந்தேன்
என் செல்ல மகள் சிரிப்பை மீறி
செல்வம் இல்லை அறிந்து கொண்டேன்

--------------------------

மாற்றிக்கொள்

சூழ்நிலை மாறும் போழ்து
சோர்ந்து வீழாதே
சூரியானாய் மீண்டும் எழு

முயற்சிக்க வாய்ப்பில்லை என்று கூறி
முயற்சிகளை முடக்கிடாதே
முதுகெலும்பே முடங்காமைக்காகதான்

தோல்விகளா !!!
அவை வெற்றிகளின் சாவிகள்
அவமதிப்பா !!!
அவை உன்னை இன்னும் ஆளாக்கும் சாதனங்கள்
தடைகளா !!!
அவை உன் வாழ்வின் இடை நிலைகள்

மாற்றம் என்பதே உன் புது தோற்றம்
மாற்றிக்கொள் அனுதினம்
வாழ்வை போற்றிக்கொள்
அதுவே மிகப் பெரும் வரம் !!!

----------------------------------

ஓரமான இடமும் ஈரமான காற்றும்

தொடர் வண்டியில் ஏறினேன்

தொடர்ந்தது என்னை மக்கள் வெள்ளம்

முன்னும் பின்னும்

முகம் துடைக்க முடியாமல்

மூச்சு விட இயலாமல்

பெட்டியிலே ஏறினேன்

பெரும் சுவாசம் நாடினேன்

வண்டி உருண்ட சில வினாடிகளில்

கிடைத்து ஒரு இருக்கை

முகம் சிரித்தது அது இயற்கை

ஆஹா

இதமான காற்றும்

சற்றே மிதமான வெயிலும்

எனை தீண்டின

எழுத தூண்டின

அதிகாலை துயில் களைவும்

அதை தாண்டி வரும் தொலைவும்

அயராத அயர்ச்சியை தந்தாலும்

இது போல் சுகமான நிகழ்வால்

மனம் சற்று சிரிக்கத்தான் செய்கிறது

-----------------------------------

டயட்
ஒரு வேளை மட்டுமே உணவருந்தி
உழவோட்டி வாழ்ந்தவனின்
உடலில் என்றும்
கொழுப்பில்லை அமிலமில்லை
உப்பில்லை ரத்த கொதிப்பில்லை
இன்றோ
இவை அனைத்தும் வந்ததால்
ஒரு வேளை சோறு மட்டும் மருந்தாய்
------------------------------------------------------------------------------
சுருங்கி போனது தீபாவளி
கைபேசியில் வெடிகளின் வீடியோக்கள்
தொலைகாட்சியில் சிறப்பு நிகழ்சிகள்
வாட்ஸ்ஆப்பில் வாழ்த்துக்கள் 
கிலோக்களின் வாங்கிய இனிப்புகள் இன்று கிராம் களில்
என
தரை இறங்கி வெடி வெடித்து
அண்டை வீட்டாருக்கு இனிப்பளித்து
அன்போடு பகிர்ந்த வாழ்த்துக்கள் போய்
இன்று நான்கு சுவர்களுக்குள் சுருங்கி போனது
தீபாவளி

------------------------------------------------------------------------------
தந்தைமை
தாய்மை போன்றா தந்தைமை
எதிர் வார்த்தை அல்ல இது நான் கண்ட புது வார்த்தை
தாய்மை தானாய் வருவது 
தந்தை மை நாம் வளர்த்தாலே வருவது
அன்னை அளவிற்கு தந்தையால்
அன்பளிக்க இயலாது தான்
ஆயினும் அன்றாடம் பிள்ளையிடம்
அன்பளிக்க வேண்டும்
அன்னையின் அரவணைப்பில்
பங்களிக்க வேண்டும்
பணி விட்டு வீடு
படி சேரும் போதே
மனம் வெள்ளை தாளாய்
குணம் மாற வேண்டும்
இல்லத்தின் உள்ளே
இன்ப தொழிற்சாலை உண்டு
அதில் எண்ணற்ற இன்பம்
தினம் உருவாகல் நன்று
பிள்ளை விரல் பற்றி
அவள்(ன்) கூட உலா சுற்றி
எல்லையில்லா இன்பம்
கொண்டு வாழ வேண்டும்
கொண்டவளின் தேவை
நமக்கு உண்டான மழலையின் தேவை
உறவுகளின் தேவை
இவை யாவும் முன்னுரிமை கோர்வை
இல்லறத்தில் நல்லறம் காண்
இல்லாளின் நலம் பெண்
ஈன்றவளுக்களிக்காதே ஊன்
தந்தை மை தலைமை
அதில் கொள் பொறுமை
தந்தையாய் கொள்வாய் பெருமை
---------------------------------------------------------------------------
அதிகாலை துயில் எழுந்து 
முக நூலில் உள் நுழைந்து 
உறக்கத்தில் உறைந்திருக்கும் 
மின் நண்பர்கள் தொடர்பைத் தேடி 
அன்றாடம் தொலைந்துவிடும் என் நேரம் 
அருகருகே எனை சுற்றும் புது நட்பை
புதுப்பிக்க ஏனோ தயங்கியது மனம்
----------------------------------------------------------------------------
என் மகள்
வளரும் என் மகளோடு நானும் வளர்கிறேன்
அவள் சிரிப்பில் உள்ள இனிமை பயில்கிறேன்
அவள் உள்ளம் கொண்ட இளமை அறிகிறேன் 
அவள் கிள்ளை மொழிகளில் நான் காதல் கொள்கிறேன்
அவள் போல நானும் தடுமாறி நடக்க முயல்கிறேன்
வீட்டில் அனைவருக்கும் அவள் கொடுக்கும் ஆனந்தம் போல்
நானும் மெது மெதுவாய் அனைவரையும்
மகிழ்விக்க விழைகிறேன்
எனக்கு பிறந்து என்னை பெற்றவள்
நாளை எனையும் தாண்டி வளர கற்றவள்
என் மகள் போல் ஒரு மகள் இவ்வுலகில் இல்லை
------------------------------------------------------------------------------
நண்பன்
நாலும் தெரிந்தவனில்லை
நமை தண்டி அறிந்தவனில்லை
போட்டி அவனிடம் இல்லை 
பொறாமை இல்லவே இல்லை
தோல்வி வரும் நேரம்
நம் தோளோடு தோளாய் நிற்பான்
வெற்றி வரும் நேரம்
நம் கால் இழுத்து தரையில் நிற்க வைப்பான்
குரல் கேட்கத் தேவை இல்லை
விழி பார்க்கத் தேவை இல்லை
நட்பின் உணர்வாலே உன்னை தேடி
ஓடி வருவான்
நண்பன்
நமக்கென்ன ஒரு நாளா நண்பர்தினம்
ஒவ்வொரு நாளுமே நண்பர்கள் தினம் தான் !!!

பதிலாய் என் நண்பன் எழுதியது 

குற்றங் களைவான் - நம்
குறைகள் மறப்பான்
வெற்றிக் களிப்பினிலே - மனம்
வேர்த்து இருக்கையிலே
உற்ற துணைவனவன் - நீர்
ஊற்றித் தணிப்பான்
சற்றுந் தளரான் - உளச்
சோர்வு துடைப்பான்.

சின்னத் தவறுகளை - புன்
சிரிப்பில் உடைப்பான்
என்ன இப்படியா - என
இடித்து உரைப்பான்
முன்னை நினைப்பான் - நமை
முழுதும் நிறைப்பான்
இன்னும் நெடுங்காலம் - உடன்
இருந்து பொறுப்பான்.

--------------------------------------------------------------------------------------

தனிமை

சுகம் இல்லாத சுமை

சுவை இல்லாத உணவு 

உடலுள்ளே மெதுவாய் புரையோடும் நோய்

உடைத்தெறிய வேண்டிய உணமையான அடிமை சங்கிலி 

நம் பின் வருவோருக்கு வழிகாட்டக் கூட ஒரே வழி

நமை நாமே நொந்துகொண்டும்

நம்முள் நாமே வெந்துகொண்டும்

இல்லாத ஆயுதத்தால் இதயத்தை இரண்டாகக் கிழித்தெறியும் 

ஒரு வேகம் குறைந்த சோகமான நிலை 

ஒரு தொலைபேசி தொடர்பில்

மூன்று அறிஞர் முப்பது முட்டாள்கள்

அறிஞர்கள் மூடரை அறியவில்லை

மூடர்கள் அறிஞரை அறிவதில்லை

மூச்சுவிட மறந்துவிட்டு முழு நாளும் பேசுகிறர்

முடிவில் என்னாகும்

மூடர் அறிஞர் ஆனரா

அறிஞரெல்லாம் மூடர் ஆனரா

மூடனாய் நானும்

முடிவறிய முயல்கிறேன்

அதிகாலை துயில் எழுந்து

அழகாய் உடை அணிந்து

அமைதியாய் அலுவலகம் போன காலங்கள்

கனவுகளில் மட்டுமே

வேலைப்பளு

குடும்ப சுமை

சுற்றத்தின் சூத்திரங்கள்

சுற்றவைக்கும் சாத்திரங்கள்

அதனால்

நம்மை அறுவடை செய்யும் ஆத்திரங்கள்

கர்மமும் தர்மமும்

நம்மை கவ்வி குதறி

மகிழ்ச்சி நெகிழ்ச்சி

எல்லாம் தூளாய் சிதறி

நாம் உறக்கத்தின் மேல் கூட

இறக்கம் இல்லாத

மன அழுத்தம்

மரண தேவனின் மறு உருவமோ  

தினமும்

எழுந்தது முதல்  வீழ்வது வரை

நொடி தோறும் நம் நாட்கள்

மடிக்கணினியுடன்

பிரியாத தோழியாயும்

சற்றும் பிடிக்காத வியாதியாயும்

இவள் பிடியை

தளர்த்தும்  இரு நாட்கள் நாளை முதல்

என்றென்னும் போது

வாரத்தின் இறுதி நாட்களும்

வாழ்க்கையின் இறுதி நாட்கள் போல்

அரிதாக

சற்றே பெரிதாக தோன்றியது

அதிகாலை எழுந்ததில்

அரைகுறையாய் உறக்கம்

ஒரு பக்கம் தலையின் ஓரம்

சற்றே மெதுவாய்தான் வலிக்கும்

இதில்

நுழைந்தது முதல் 

இருக்கை விட்டு எழுந்தது வரை

இடைவிடா தகவல் பரிமாற்றங்கள்

பங்கு சந்தை போல் உடல் நிலையில் ஏற்ற இறக்கங்கள்

பணி பற்றி பேசும் ந(ண்)பர்கள் பலர்

இதில் என் பிணி பற்றி கேட்க இங்கில்லை சிலர்

தனியாக சற்றே பிணியாக 
இருந்தும்
விரும்பாமல் போனாலும்
இவ்வுலக வியாபாரம் எனை வீழ்த்தியது